[中餐食食篇] 貴貴的米芝蓮星級食府<鏞記>名過其實

[中餐食食篇] 貴貴的米芝蓮星級食府<鏞記>名過其實
經常聽到上了年紀的人說, 中環鏞記的燒鵝太好味, 鵝香撲鼻, 皮脆肉嫩, 鵝油撈麵更是無得頂, 今日有幸到來一試, 這裡一共有5層, 聽聞普通食客只可以用餐於一二樓, 三樓或以上係留給名人食家

大樓外面金光燦燦, 大堂的樓梯旁有石山流水, 我們上到二樓, 坐我們旁邊的全是旅客在用餐, 有馬來西亞, 新加坡 及中國遊客等~

聞說這裡的酸薑皮蛋($44, 4位)都很有名氣, 用上的是約27-29日的皮蛋, 先來一份作為小食醒下胃先, 皮蛋晶瑩通透, 外層非常彈牙, 蛋黃係溏心的而且嫩糯美味, 皮蛋味道十分香濃, 夾上子薑, 子薑則切成非常薄的片, 突顯廚師精湛的刀工, 味道爽脆嫩無渣, 酸酸甜甜得來也不會太辣, 很開胃, 溏心皮蛋，而且還看得見的松花，又好睇又好食! 未開飯, 已經令人好期待之的餸菜

燒鵝併乳豬及叉燒($410)上到枱時只有微暖, 燒鵝的香味也欠奉, 皮也不脆, 不會切得很大件, 肉也比較少, 肉質異常結實, 都幾考驗食客D牙力，本人覺得有點名過其實, 整隻鵝都偏瘦, 燒鵝下的甜豆都算好食
秋冬的鵝理應偏肥1D, 肉及脂肪也會多D, 到達到合適年齡及體重才會推出市場, 真係第一次食到D 咁瘦及靭的燒鵝, 燒鵝都係深井裕記好味好多
乳豬及叉燒都0係微暖, 味道普通

太子薑蔥鵝油撈麵($126, 3位), 相傳甘太子當年自創的, 就只於廣東蛋麵, 再加上在鵝脾位置上的鵝油, 撈埋一起食。蛋麵雖然彈牙但鹼水味好重, 而且鵝油雖然好香但都帶1 D羶味, 可能唔夠熱, 最後再品嚐大地魚和蝦籽精華的高湯, 但偏咸

松子雲霧燻香肉 ($350)是要預訂的, 每件看上去都是閃”令令”的,而且充滿油分, 豬肉經過特製的煙燻方法,食時散發出陣陣的煙燻香, 肉質超嫩超腍，肥皂好晶瑩剔透, 食落去1 D都不覺得油膩, 最重要的是要趁熱食

香蔥豬潤鷄煲($150) 是於餐牌上沒有的, 聞說係鏞記的懷舊菜, 是不容錯過的餸, 亁蔥青蔥豬潤雞件爆香後再用瓦煲上, 一打煲蓋, 香氣四溢, 令人唾液, 豬潤用上黃沙豬潤, 可惜切得太薄, 令味道唔濃郁, 雞件唔夠鮮味, 否則送飯一流

錦鹵雲吞 ($160) 雲吞一口一粒, 雲吞包著豬肉, 豬肉鮮味多汁, 實在很難得炸雲吞都可以咁多汁, 外層脆身就一定LA, 點上那酸酸甜甜的醬汁更加能夠減其膩, 而且醬汁內仲有很多材料, 味道是不錯的, 喜愛吃炸雲吞的朋友不妨一試。

因天氣轉涼, 正好來個生炒臘腸糯米飯($190), 也是今年入冬以來第一次品嚐, 當中有蛋絲, 臘腸和糯米飯。這裡的生炒糯米是利用鑊中慢炒, 一邊炒米, 一邊加湯, 將糯米炒熟, 糯米飯粒粒分明, 稔中有爽勁, 糯米有彈性, 加上臘腸和蛋絲，有煙靭和蛋味的感覺, 真係百食不厭

魚湯杞子浸荳苗瑤柱甫($350), 賣相精美, 高湯鮮味, 荳苗超嫩, 1 D靭及草青味都無, 瑤柱甫釀於蘿蔔內, 鮮甜可口,

秋臘玉帶龍王脆米($450), 大大粒帶子煎得好甘香, 帶子非常鮮味, 上面放上用XO炒香的臘腸, 下面仲有脆米

可惜蛋撻已經賣哂, 叫左陳皮紅豆沙($180, 5碗), 但陳皮味道唔太香濃, 紅豆沙唔似把紅豆煮到起沙, 比較似將紅豆煮熟後再磨成蓉後, 再煲煮, 食落仲有少少苦澀,

畔塘芝麻卷($36/碟), 好多中式好酒樓已經沒有再有菲林卷, 一定要叫黎食下,緬懷一下小時侯, 可惜芝麻味道好淡

煎堆仔($11/個) 圓轆轆煎埋, 皮薄又脆, 裡面還有蓮蓉

侍應招呼很週到, 經常主動過來加茶, 他們對不同菜式都有認識, 旁邊一張檯坐了幾個遊客, 他們向侍應查詢時侍應都很耐心解答, 並提供菜式的建議給他們。而且檯與檯之間有足夠空間, 唔會很嘈雜, 坐得相對舒適。

與一般中式食肆相若，未見驚喜。明白到歷史悠久的食店，的確需有其出色之作，才能成就今天的屹立不倒。